ಆಟ ಕೂಟೊಲು ದಾಂತಿ
ಆಟಿ ತಿಂಗೊಲ್ದ ಖುಷಿಯೇ ಬೇತೆ ಬುಡು ಬುಡ್ಪಾದ್ ಪನಿಯೆರೆ ಪದೊಕುಲು ತಿಕ್ಕಾಂದೆ ಯಾನ್ ಸೋತೆ. ಕಾರ್ತೆಲ್ದ ಜಡಿ ಬರ್ಸೊದ ಬೆರಿಕ್ ಬರ್ಸ ಬರ್ಸದ ಇಡೆ ದೊಂಬುದ ಉರಿಕ್ ಆಟಿ ತಿಂಗೊಳೆ ಬರೊಡು ಅಟ್ಟೊರ್ದ ಜಪ್ಪ್ಡಾಯೆರೆ ಮರಿಯಲೊದ ಸರಕ್! ತೂಟು ಪಾಡ್ದ ಗುದ್ದುದೆತ್ತ್ನ ಬೊಳ್ಳೆನ ಬೀಜ ಪೆಲಕೈದ ಹಪ್ಪಳದ ಕುರು ಕುರು ಸಬ್ದಾ ಪುಲಿಂಕೊಟೆ ಸಾಂತಣಿ ಬಾಯಿಡ್ ಇತ್ತ್ಡಂಡ ಜಿರಿ ಜಿರಿ ಬರ್ಸೊಗುಲಾ ಭಾರೀ ಮಜಾ! ಪೊಸ ಮದಿಮಲೆ ಸೇಲೆ ಮುಗಿಂಡಲಾ ಆಟಿ ಕುಲ್ಲುನವು ಪಜಿಪಜಿ ನೆಂಪು ಕರಿಪೋಯಿ ಹಿರಿಯಕ್ಲೆಗ್ಲಾಆಟಿ ಬಲಸ್ದ್ ಸಂಪು.
ಆಟಿ ಅಮೂಸೆದ ಆಸೆದ ತೀರ್ಥ ಮೀಯೆರೆಲಾ ಉಂಡು ಬೊಲ್ಕಲ್ಲ್ದ ಒಗ್ಗರಣೆ ಪಾಡ್ದ್ ಪಾಲೆಮರತ ಮರ್ದ್ ಪರಿಯೆರೆಲಾ ಉಂಡು. ಬೆನ್ನಿದಾ ಬೇಲೆ ಮುಗಿಯೊಡು ಚೇವುದಿರೆತ ಪತ್ರೊಡೆ ತಿನೊಡು ತಜಂಕ್ ಪೆಲತರಿದ ರುಚಿ ತೂವೊಡು ಗಗ್ಗರದ ದನಿ ಕೇನ್ಯೆರೆ ಆಟಿ ಕಳೆಂಜೆ ಜಾಲ್ಗ್ ಬರೊಡು!
ಚೆನ್ನೆಮಣೆಟ್ ಗಿಜಿ ಗಿಜಿ ಪನ್ಪುಂಡು ಕಾಯಿತಿಂಗೊಲ್ಗ್ ತೋಜಾದ್ ಸಾದಿ.
