Navayuga Tulu Sanchike 1936 - Poem

ಕರ್ನಾಟಕ  - ಏಕೀಕರಣ - ಪರಿಷತ್!
                                                                                     - ತುಳುಮರ್ಲೆ

ಲೋಕೊದ ಪಾತ್ರೊಡು ಕತ್ತಲೆ - ನೀರೆ

ದಿಂಜ್ದ್ ಉಕ್ಕೊಂದಿತ್ತ್ಂಡ್

ಬಾಣದ ಬಟ್ಟಲ್ ಸೋರುದು ಸೋರುದು
ಊರೇ ಮುಲ್ಕೊಂದಿತ್ತ್ಂಡ್.

ಎಂಕಲೆ ಇಲ್ಲದ ಪಿರಪದ ಕಂಡೊಸು
ಕಪ್ಪೆಳೆ ಸಭೆ ಆದಿತ್ತ್ಂಡ್
ಪಿರಪದ ಜನ್ಮೊಡು ಕಪ್ಪೆನೆ ಏನ್
ಅಯಿಕುಲೆ ಭಾಷೆಲ ಗೊತ್ತುಂಡು.

ವಾ ನಮುನೆದ ಸಭೆ! ವಾ ವಾ ಕಪ್ಪೆ!
ಚೊಳ್ಳೆ ಕಪ್ಪೆಲಾ ಬೈದ್ಂಡ್!
ಚೊಂದೆ ಕಪ್ಪೆಲಾ ಮರತ ಕಪ್ಪೆಲಾ,
ಡೊಳ್ಳೆ ಕಪ್ಪೆಲಾ ಬೈದ್ಂಡ್!

ಅದಗ ಕಂಡಳೊನಿ ದತ್ತ್ಂಡಾತೇ
ನಾಯೆರ್ ಕೊರೆದಿನ ಅಂಚಿಂಚಿ
ಮಣ್ಣ್ದ ದಂಡೆಲು ಅಲ್ಪಾದಿತ್ತ
ಕಪ್ಪೆ ಸಭಿಕೆರೆಗ್ ಅವು ಬೆಂಚಿ!

ಬರ್ಸದ ಹೊಡತದ ಜೋರುನಿ ತೂದು
ಆನಿದ ಸಭೆ ಪನಿ ತಡೊವಾಂಡ್
ಒರ್ಂಬ ಗಂಟೆಗೇ ದೀತಿನ ಸಭೆ ಅವು
ಪತ್ತ್ ಗಂಟೆದಗ ಸುರುವಾಂಡ್.

ಚೊಳ್ಳೆ ಕಪ್ಪೆ ಆ ಸಮಯೊಡು ಒಂಜಿ
ಮೋರೆ ಮಿತ್ತ್ ಮಲ್ತ್ದ್ 'ಟೊರ್'
ಉಂದ್ದ್ ಪಲ್ಲವಿ ಪಾಡಿನ ಬೊಕ್ಕ
ಮಾತ ಸೇರ್ದವ್ವೆನೆ ಪಂಡೊ.

ಅವು - ಆ 'ಡೊರ್ ಡೊರ್' - ದಾದೊ, ಪಿಂಬರಾ?
ಕಪ್ಪೆಳೆ ಗಾಡ್ ಸೇವ್ ದೀ ಕಿಂಗ್!
ಪ್ರಾರ್ಥನೆ ದಾಂತಿನ ಎಂಚಿ ಜಂಬರಾ?
ಪ್ರಾರ್ಥನೆ ಅವು ಡಿಂಗೋ ಡಿಂಗ್!

ಐನ್ ಮಿನಿಟ್ ಪ್ರಾರ್ಥನೆ ನಡತ್ಂಡ್
ಬೊಕ ಕಾರ್ಯಕ್ರಮ ಸುರುವಾಂಡ್
ಚೊಂದೆ ಕಪ್ಪೆ ಒವ್ವೋ ಲಕ್ದುಂತುಂಡು
ಕಾರ್ಯದಶೀ ಅವು ತೋಜುಂಡು.

ಆ ಕಪ್ಪೆನೆ ಲಕ್ದುಂತುದು ಈ ಸಭೆ
ಸೇರ್ದಿ ಕಪ್ಪೆಳೆ ಪರವಾದ್
ಮೀನವೈರಿ ಮಾಂಡೂಕ್ಯಾಚಾರ್ರೆನಿ
ಅಧ್ಯಕ್ಷೇವೆರೆ ಕೇಂಡೊನುವೆ

ಈತ್ ಪಂಡ್ದವು ಕುಲ್ಲುನೆ, ಭಾರೀ
ಮಲ್ಲ ಕಪ್ಪೆ ಲಕ್ದುಂತೊಂದು
ಅಲ್ಲೇ ಇತ್ತಿನ ಸವರ್ೇಕಲ್ಲ್ಡ್
ಲಯ್ತ್ದ್ ಪೊಲರ್ುಡು ಕುಲ್ಲ್ಂಡು.

ಎನ್ನಡ್ ಮಿತ್ತ್ದ ಯೋಗ್ಯತೆ ಇತ್ತಿನ
ನೇಲ ನೇಲಾಕುಲು ಇತ್ತೇರ್
ಆಂಡಲ ಎಂಕೀ ಗೌರವ ಕೊರಿನೆಡ್
ಎಂಕಿನಿ ಉಪಕಾರದ ಹೇರ್-

ಆಂಡಲ ಸಭಿಕೆರ್ ಮಾತೆರ್ ಸಾಯೊಡು
ಮುಗಿಪುವೆ ಎನ ಕೆಲಸದ ಭಾರ
ಒಂಜೆನೆ ಭಾಷಣ ಕತರ್ೆರ್ ಮಕ್ಷಿಕ-
ಭಕ್ಷಕ ರಾಯೆರ್ ಬೈದೆರಾ?

ಮಕ್ಷಿಕ-ಭಕ್ಷಿಕ ರಾಯೆರ್ ಬತ್ತ್ದ್
ಲಯ್ತೆರ್ ಕಟ್ಟದ ಪುಣಿತಡೆಗ್-
ಓ ಎನ ಸೋದರಿ ಸೋದರರೇ, ಒರ
ಕೆಬಿ ಕೊರುವಾರಾ ಪಿನಿ ಇಡೆಗ್?

ನಮ ಮಂಡೂಕೆರೆ ಪಿರಪದ ಚರಿತೆನ್
ಪಿರಪದ ವೈಭವ ನೆನೆತ್ಂಡ
ಇನಿತ ಈ ಪರಿಸ್ಥಿತಿಳೆನಿ ತೂನಗ
ಕಣ್ಣ್ಡ್ ನೀರೇ ಪನಿಪಂದ?

ಭಾರತ ಕಾಲದ ವೀರೆರೆ ಗುರುವರೆ
ದ್ರೋಣಾಚಾಯರ್ೆರ್ ನಮ್ಮಾರ್!
ಮಂಡೂಕ್ಯೋಪನಿಷತ್ತೇ ಪಣ್ಂಡ
ಭಾರೀ ಪಳಪದೊ ಪಿನಯಾರ್?

ಮಾನವ ಲೋಕೊಗು ಬೊಳ್ಪು ಕೊರಿಂಚೀ
ಋಷಿಕ್ಳೆ ಮೂಲದ ನಮ್ಮ ಕುಲ,
ಇನಿ ಈ ಗೋಳುಡು ಬೂರೊಂದುಂಡಡ
ನಮ ದುರದೃಷ್ಟನೆ ಭಾರಿ ಬಲ!

ಪೂರಾ ಜಾತಿಳು ಸಂಘೊಳು ಮಲ್ತ್ದ
ತನುಕುಳೆ ಹಿತೊಳೆನ್ ಕಾತೊಣುವೊ
ನಮ್ಮಾಕುಳೆಗಾ? ಸಂಘಟನೆನ್ಪಿನ
ಶಬ್ದನೆ ಪಿನಂದ್, ದಾನೆನುವೊ?

ಮುರಾನಿ ಕೇಂಡಿನ ಸುದ್ದಿನಿ ತೆರಿಪವೆ,-
ಒಳ್ಳೆಳೆ ಪ್ರಬಲತೆ ಹೆಚ್ಚಾದ್,
ನಮ ಕೂಟೊಳೆನೇ ನುಂಗೆರೆಗೆಣ್ವೆರ್
ನಾವು ತೂಪಿನಾ ಪೆಚ್ಚಾದ್?

ಏತೋ ಒಳ್ಳೆಳೆ ಬಾಯಿಗ್ ಪೊಗ್ಯಂದಿ
ಕಪ್ಪೆಳು ನಮ್ಮಾಕುಳೆಡುಳ್ಳ
ಮೋಕುಳು ಮಾತೆರ್ ಸೇರ್ದುಂತುಂಡ
ಒಳ್ಳೆಳು ಕೇರೆಳು ಓಳುಳ್ಳ?

ಈತೇ ಮಾತ್ರನ? ನಮ ಆಹಾರೊಗು
ದೇವೆರ್ ಸೃಷ್ಟಿತಿ ಮೀನುಳುಲ
ಕೆಲೆಂಜಿ ಜಾತಿಲ ಸಂಘೊಳು ಮಲ್ತ್ದ್
ನಮ ಬಾಯಿಗ್ ಮಣ್ಣ್ ಪಾಡಿಳಿಯೆ?

ಈ ಮೀನ್-ಕೆಲಂಜಿಳೆ ಸಂಕೋಚದ
ಬುದ್ಧಿನ್ ನಮ ಇಸೆ ಖಂಡಿಪೊಡು!
ಓಳ್ಳೆಳೆ, ಕೇರೆಳೆ ಅತ್ಯಾಚಾರೊನು
ನಿಮಿಷಲ ತಡೆವಂದೆ ದಂಡಿಪೊಡು

ಚೀನದ ಜನಕುಳು ನಮ ಕುಲ ತಿನ್ಪೆರ್
ನಾವುಂದೆನ್ ನನ ತಡೆಪೊವೊಡು!
ಇಂಚನೆ ನಮ ಕುಲ ಸೈತೇ ಪೋಂಡಾ
ನಮ ಅವಸ್ಥೆ ನನ ಒಡೆ ಪೋವೊಡು?

ಆನಕುಲು ನನ, ತೋಡುಳು, ಕಟ್ಟದ ಪುಣಿ,
ಗೋಡೆಳು ದಂಡೆಳು ಕಟ್ಟಾದ್
ನಮ ಏಕೀಕರಣ ತಡೆಪಾವುನ
ಅತ್ಯಾಚಾರನ್ ಉಂತಾವೊಡು.

ಇಂಚ ಠರಾವುನಿ ದುಂಬು ದೀಪುಣನೆ
ಸರ್ವಸಮ್ಮತಿಡ್ ಪಾಸಾಂಡ್!
ಈತೆನ್ ಮಲ್ತ್ದ್ ಸಭೆ ಮುಗಿದಾಕಿನೆ
ಕಪ್ಪೆಳೆ ಸಭಿಕೆರ್ ಲಕ್ ಪೋಂಡ್!

ಓ ವಾಚಕರೇ, ಈ ಸಭೆ ತೂನಗ
ಕನರ್ಾಟಕ ಏಕೀಕರಣ
ಸಭಿಕುಳೆ ನೆಂಪಾಪುಜ್ಜಾನಿಕಲೆಗ್,
ದಾನೆನುವರ್? ನನ ಪೋಪುಣನ?


ನವಯುಗ ತುಳುಸಂಚಿಕೆ - 1936